Time bibliotek gjer Garborgsenteret betre.
På Time bibliotek blir du møtt av hyggelege og kunnskapsrike tilsette.
På biblioteket er du alltid velkommen.
På bilbioteket føler du deg heime.
Du får hjelp til nesten alt. Gratis.
På biblioteket kan du logga deg på nettet sjølv om du ikkje har råd til PC.
På biblioteket kan du lesa aviser.
På biblioteket kan du treffa andre menneske.
På biblioteket får du varmen i tærne.
På biblioteket kan du øva deg på å snakka norsk.
På biblioteket er du velkommen uansett hårsveis, hudfarge, religion og favorittlag.
Du treng ikkje strøymetenester for å låna filmar på biblioteket; men treng du allikevel å strøyma, tilbyr biblioteket det òg.
På biblioteket kan du lesa til eksamen.
På biblioteket kan du gå på kino.
På biblioteket kan du henga etter skuletid.
På biblioteket kan du få leksehjelp.
På biblioteket kan du spela sjakk.
På biblioteket er det arrangement for alle.
På biblioteket er det foredrag om fred, demokrati, klima og politikk.
På biblioteket er det konsertar.
På biblioteket er det bokbad med forfattarar.
På biblioteket er det folk som får deg til å le.
På biblioteket er det folk som fortel om Time og Jæren.
På biblioteket kan du finna Willy.
Du kan låna peikebøker, barnebøker, ungdomsromanar, faktabøker, biografiar og kokebøker. Du kan låna Bibelen. Du kan låna dikt, krim og noveller. Du kan låna Jon Fosse og Jo Nesbø. Du kan låna teikneseriar som skal lesast frå høgre mot venstre.
Du kan låna bøker som trendar på TikTok.
På biblioteket kan du låna norske bøker og utanlandske bøker, bøker på norsk og bøker på utanlandsk, lydbøker og bøker med lyd.
Innimellom kan ein bibliotekar lesa for deg.
På biblioteket blir du flinkare til å lesa sjølv.
På biblioteket kan du lesa om leseforsking:
Viss du les godt, lærer du fortare, tenker djupare, hugsar betre, forstår meir.
Forstår kommunestyrerepresentantane i Time leseforskinga?
Forstår dei kva det betyr å kutta i drifta til biblioteket?
Viss ikkje, må dei lesa meir.
Det kan dei gjera på biblioteket.