Jubileumsårboka er komen!

Kva gjev ein til folk som har alt? Kva med Jærmuseet si jubileumsårbok 1985 - 2010? Kjøp boka på Vitengarden, Vitenfabrikken og i lokale bokhandlarar. Pris kr. 295,-.

Jærmuseet er i dag både museum og vitensenter.
Kjerneaktiviteten i eit vitensenter er populærvitskapleg formidling gjennom interaktive utstillingar og eksperiment. Den pedagogiske verksemda vil ha eit sterkare fokus i eit vitensenter enn i eit tradisjonelt museum. Samtidig skal Jærmuseet ta hand om grunnleggande museumsoppgåver som innsamling, bevaring, dokumentasjon og forsking - og fornying.

Samspelet mellom museumsrolla og vitensenterrolla gir òg styrke og mulegheiter i forhold til tradisjonelle vitensentra. Musea sin tilgang til samlingar, historie- og tradisjonskunnskap inneber at institusjonen lettare kan sjå naturvitskap og teknologi i samanheng med historiske og samfunnsmessige utviklingsliner, og knyta formidlinga til kulturelle og almenndannande rammeforteljingar.

Jærmuseet har i dag driftsansvaret for, eller er i ferd med å overta driftsansvaret for, anlegg og prosjekt i alle dei sju stiftarkommunane.

Og me har kosta på oss ei eiga jubileumssoge for Jærmuseet, skriven av faghistorikaren Lars Gaute Jøssang. «Museumsaskeladden på Jæren» har han kalla artikkelen sin.

Ved oppstarten i 1985 hadde Jærmuseet ein tilsett mekanikar, i 2010 stod over 80 personar på lønningslista - fordelt på vel 50 årsverk. Jærmuseet var det nyaste, og lenge det minste, av dei fem regionmusea i Rogaland.

I dag er det det største regionmuseet i fylket; eit moderne museum som både har fått nasjonal og internasjonal museumsheider, og som i fylgje eksterne vurderingar held høg internasjonal kvalitet. Jøssang prøver både å spora kva drivkrefter i organisasjonen og miljøet omkring som har tilskunda denne utviklinga, og kva samfunnsmessige rammevilkår og utviklingstrekk som kan ha «rydda veg» for ein slik vekst.