PELS er ei 400m2 stor utstilling om pelsdyr og pelsdyrhald, og er aktuell sidan 31. januar 2025 er siste dag det er lovleg med pelsdyrhald i Norge. Utstillinga dekker tida frå forsøka på reveoppdrett på øya Brattholmen i Tysvær i slutten av 1890-åra og fram til forbodet. I 1969 var det heile 721 pelsdyrgardar på Jæren, mot 53 i 2015. Tal av dyr har likevel heldt seg stabilt. Geografisk er utstillinga lokalt forankra på Jæren, men med linjer til nasjonal pelsdyrhistorie og internasjonale påverknadar.
Forteljingar i utstillinga
Overordna dreier utstillinga seg om pelsdyrnæringa over 125 år og om vekst, medgang, motgang og slutt. Aktørar har snakka på vegne av dyra og førestillingane deira har til dels vore sterkt motstridande. Dei eksiterer og eksisterte i kraft av å spegle kvarandre. Slik at det opstått det vi i utstillinga kallar ulike “dyr”. Me har funne ni slike dyr som organiserer utstillinga tematisk. Dei ni er følgjande:
- Pelsdyrbøndene sine dyr
- Motstandsrørsla sine dyr
- Forskarane sine dyr
- Dyra i eventyr og segn
- Politikarane sine dyr
- Mattilsyn og veterinærar sine dyr
- Dyra som skinn, “buntmakerdyret”
- Dei ville dyra – minken og reven i det fri
- Framstillinga av dyr i motebransjen
I utstillinga har kunstar Per Dybvig bidrege med illustrasjonar av dei ulike dyra. Og i delen som handlar om mote, har museet fått låne pelskåpa til dronning Maud av Nasjonalmuseet. Kåpa skal vera på Vitengarden ut august.
Jæren Sparebank og Fritt ord har gitt økonomisk støtte til utstillinga.