I samband med at 31. januar 2025 er siste dag det er lovleg å halde dyr for pelsen si skuld i Norge, opnar Vitengarden ei 400m2 stor utstilling om pelsdyr og pelsdyrhald. Sundag 2. februar er første dag utstillinga er open for publikum.
Utstillinga dekker tida frå forsøka på reveoppdrett på øya Brattholmen i Tysvær i slutten av 1890-åra og fram til forbodet. Geografisk er utstillinga lokalt forankra på Jæren, men med linjer til nasjonal pelsdyrhistorie og internasjonale påverknadar.
Forteljingar i utstillinga
Overordna dreier utstillinga seg om pelsdyrnæringa over 125 år og om vekst, medgang, motgang og slutt. Aktørar har snakka på vegne av dyra og førestillingane deira har til dels vore sterkt motstridande. Dei eksisterer og eksisterte i kraft av å spegle kvarandre. Slik har det oppstått det vi her kallar ulike “dyr”. Dei blei til og endra historisk. Me har funne ni slike dyr som organiserer utstillinga tematisk:
- Pelsdyrbøndene sine dyr
- Motstandsrørsla sine dyr
- Forskarane sine dyr
- Dyra i eventyr og segn
- Politikarane sine dyr
- Mattilsyn og veterinærar sine dyr
- Dyra som skinn, “buntmakerdyreet”
- Dei ville dyra, minken og reven i det fri
- Framstillinga av dyra i motebransjen.
Dei ulike temaa har fått kvar sine rom i utstillinga.
Utstillinga baserer seg på dokumentasjon (intervju, film, foto og gjenstander) som Jærmuseet har samla inn blant aktørar i pelsdyrnæringa i Rogaland sidan 2021. Denne avdelinga får størst vekt i utstillinga. Men museet har og samla inn materiale frå aktørar som representerer dei andre “dyra”.
Kunstnar Per Dybvig har bidrege med teikingar av dei ni forskjellige dyra i utstillinga, og arkitekt Alexandria Algard har bidrege med utstillingsarkitekturen.
Me håpar utstillinga gjer viktig kunnskap om ei næring som er lagt ned. Pelsdyrhald er konfliktfylt og mange har sterke meiningar om tema. Målet er at utstillinga engasjerer publikum som står på ulike sider i konflikten. Utstillinga skal medverke til at publikum tenker gjennom, uttrykker og blir medveten om at det eksisterer ulike førestillingar om pelsdyra, og fremme dialog mellom menneske med motstridande meiningar om pels og pelsdyrhald.
Utstillinga finn du i kjellaren på Vitengarden.
Jæren Sparebank og Fritt ord har gitt økonomisk støtte til utstillinga.